ThawngthaTaktak Si: Pasaltha Hna Nih An Khamh/Phomh Cang Hna

Mindat-Matupi lam ah CDF-Mindat nih ralhraang motor tlar an kah hna i ralhraang pali an thi tiah an thanh. Mindat in Matupi lei panh in a kal mi Council ralhraang motor phu cu Mindat in meng 42 a hlaatnak hmun ah, nihin zaanlei suimilaam 5:00 hrawng ah CDF-Mindat nih an kah hna i ralhraang pali an thi, CDF-Mindat lei in hma pu an um lo tiah an thanh. Nihin zaanlei sang ah meng 45 nak zawn zong ah CDF-Mindat nih bomb an puah hna ca ah Council ralhraang a thi mi le hma pu an um kho tiah Mindat Mizapi Uknak Bu nih an thanh. Crd- the hakha post

Rel chap: Chin ramkulh Mindat in Matupi lei ah a kal mi ralhrang phu hna motor cu mengtung 27 pawng ah January 10, chunhnu suimilam 1:00 hrawng ah Chin Defense Force nih an doh hna. Ralhrang phu motor cu tank 2 telh in motor 90 leng an si,  kahdohnak a chuahnak hmun hi CDF nih an i fian tuknak hmunhma le thil sining ṭha tuk in an theih cia caah hliamtuar um lo in CDF hna cu hnu an tolh kho ṭhan, tiah chimphuannak nawlngeitu nih cun DVB ah a chim. Nawlngeihnak latu ralhrang phu le Chin mizapi vengtu ralkap phu CDF kaphnihkar kahdohnak cu suimilam cheu hrawng an rau,

Ralhrang phu nih hriamngan an hman tuk lo caah le ralhrang phu minung an tam caah hliamhma tuar le a thi mi zong an tam lai tiah ruah a si. Kaphnihkar kahdohnak a chuak mi kong ah ralhrang phu lei nih thawngzamhnak an chuah mi a um lo, kahdohnak ruangah kaphnih in a thi mi le hliamtuar kong ah fianghlang in theih a si rih lo. A luan cia 2021 November thla ah Palatwah in Matupi lei ah a kal mi ralhrang phu motor cu kahdoh an ton caah ralhrang minung 60 in 90 kar an thi, tiah CDF nih an chim. Crd-the chin post.

Thawng dang: SAC Ralhrang Rual Nih An Kulh Dih Caah Myaing PDF Pahnih Hna Cu Bomb I Puah Hnawh In An Nunnak A Liam! Myaing peng chungah SAC ralhrang ralkap nih kahdohnak tuah in an kulh dih hna caah Myaing PDF pahnih hna cu bomb hmangin anmah le anmah an i puah hnawh tiah Myaing PDF nih mipi sinah theihternak cathanh an chuah. Nihin January 10 zinglei caan ah nawlngeihnak latu SAC ralhrang ralkap nih thazaang 400 hrawng in khua chung ahcun kahdohnak an tuah tiah theih a si. Cucaah mipi vengtu phu he hmaiton in kaphnih kahdohnak a chuak tiah Myaing PDF nih an chim.

Myaing peng chung thlenglei Kaing Taw Mah lamah SAC ralhrang ralkap sawmnga (50) hrawng, ni tlaklei sang Ba Hin lamah SAC ralhrang ralkap zakhat (100) tluk le ni tlaklei sang Min Taa Ciah lamah SAC ralhrang ralkap sawmriat (80) tluk nih kahdohnak tuah in ram chungah luhhnawhnak an tuah. Asinain Ba Hin lam lei Ta Ke Kan khua pawngah Myaing PDF pahnih hna cu SAC ralhrang ralkap rual nih an kulh dih cang caah bomb hmangin anmah le anmah an i puah hnawh tiah Myaing PDF nih fehter in cathanh an chuah.

Zanlei suimilam 3:00 tluk ah a si tiah theih a si i, atu caan karlak thil sining he pehtlai in chim a har ngai. Nawlngeihnak latu SAC ralhrang ralkap nih biatak tein kahdohnak a kan tuah tiah Myaing PDF phu ah tuanvo ngeitu pakhat nih a chim. Myaing PDF nih nunnak a liammi ralkap pahnih, pasaltha hna cungah upatnak zong kan pek hna tiah an langhter chih. Atu caan karlak kahdohnak kong he pehtlai in mipi hna nih nawlngeihnak latu SAC ralhrang ralkap he a hlatnak le himnak hmunah nan um nakhnga theihternak he zangfah kan in nawl hna tiah an langhter. Crd- the federal times

Leave a Reply

Your email address will not be published.