Thlanglei Dagon Peng Ah SAC Ralhrang Nih Mino 17 SAC Ralhrang Ṭuan Ding In An Tlaih Hna

Yangon ramṭhen, nitlak thlanglei Dagon peng ah SAC ralhrang nih mino 17 SAC ralhrang ṭuan ding in an tlaih hna tiah theih a si. February 12, zanlei suimilam 5 tluk ah SAC ralhrang, palik le khuabawi hna i bawm in nitlak thlanglei Dagon, Industry Zone 1 ah rian a ṭuan lio mi mino 17 cu an ID card an check-hlat hna i kum 18 an tlin cang caah “Mipi ralkap luh ding” timi phung ningin nan lut lai tiah an tlaih hna i motor in an kalpi hna tiah Yangon peng ral lei thawng zamhnak pakhat nih Khit Thit Media ah a chim.

Tlaihkhih a tongmi mino 17 hna hi khuate lei ah khuasami an si i rianṭuan ding in Yangon a rak kaimi an si tiah theih a si. Crd- Lungmili Post. Thawng dang: AA Nih An Laak Mi Khuapi Hna Cu SAC Nih Cunglei In Bomb A Thlak Caah Nikhat Chungin Tualchung Mi 9 Nunnak A Liam. Arakan Army AA ralkap nih an laak mi Paletwa peng Kyaukdaw khuapi cu SAC ralhrang nih raltutuknak vanlawng in bomb an thlak caah nikhat chungin tualchungmi 9 nunnak liam, 11 naak tlawmlo nih hliam an tuar, tiah unau thum nih an langhter.

Arakan Army AA ralkap nih an humhak mi Paletwa cu February 11, zanlei suimilam 5:00 tluk ah raltuknak vanlawng pakhat in voi 2 tiang bomb a thlak pin ah seh meithal (Machine Gun) in a kah rihtiah theih a si. Cunglei bomb thlakhnawh kahdohnak in ngakchia 1 telhchih in tualchungmi 2 nunnak liam, midang 4 naak tlawmlo nih hliam an tuar, tiah an langhter. Cu bantuk ṭhiam in February 11, zaan suimilam 9:00 tluk ah SAC nih raltuknak vanlawng in Kyaukdaw khuapi ah bomb a thlak ṭhan i tualchungmi 7 a hmun ah an nunnak liam.

Midang 6 tluk nih hliam an tuar, tiah tualchungmi hna nih an chim. February 12, zanlei suimilam 3:00 tluk zongah Minbya peng, Paleypuak khua pawng ah SAC ralhrang nih cunglei in bomb a thlak caah tualchungmi 4, nih hliam an tuar, tiah Minbya tualchungmi nih an chim. Paletwa khuapi telchih in Kyaukdaw, Mrauk-U, Minbya, Paukdaw Taungpyu khuapi hna cu Arakan Army AA ralkap nih an kah i an humhak dih cang tiah unau 3 nih an langhter.

Leave a Comment

Leave a Reply

Your email address will not be published. Required fields are marked *