Thongtla 230 Leng Le Kalaymyo In Thongtla 26 Nih Luatnak An Hmuh

Insein Thonginn In Thongtla 230 Leng Le Kalaymyo In Thongtla 26 Nih Luatnak An Hmuh, Ramkhel Thongtla An I Tel Lo, 2023 April 17, ah thongtla 3015 cu luatnak kan pek hna lai tiah SAC nih cathanh chuah in luatnak a pek hna. Tutan ah luatnak a hmutu hna nih sualnak an tuah ṭhan a si ah cun, thongtlak ding a taangmi kum caan relpiak chih in thongthlak an si ṭhan lai tiah cathanh an chuah. Thongtla luatnak a hmutu hna chung ah Yangon,

Insein thonginn ummi thongtla 230 leng nih luatnak an hmuh nain luatnak a hmutu hna chung ah ramkhel lei thongtla pakhat hmanh ka hmu hna lo tiah Insein thonginn hmai ah a phanmi ramkhel lei thongtla chungkhar pakhat nih a chim. “Nihin ah SAC ralkap nih Insein thonginn in luatnak a pekmi hna chung ah SAC ralkap uk duh lo langhternak tuah ruang ah tlaihkhih a tongmi ramkhel lei thongtla luatnak pekmi ka hmu hna lo.

Sualnak a phunphun ruang ah le rithai-sii ruang ah thongthlak a tongmi hna lawng ka hmuh hna” tiah a chim. Sagaing ramṭhen, Kalaymyo thonginn in thongtla 26 nih nihin April 17, zinglei ah luatnak an hmuh ve tiah theih a si. Luatnak a hmutu hna chung ah pa 23 le nu 3 tiin 26 an si. Cu chung ah ramkhel lei thongtla luatnak a hmumi kan hmu rih hna lo, a tam deuh cu rithai-sii ruang ah thongthlak a tongmi hna an si tiah ramkhel lei cawlcanghnak a tuahtu pakhat nih a chim.

A luancia 2023, January 4 zong ah Kalaymyo thonginn in thongtla 77 nih luatnak an rak hmuh tiah theih a si. Myanmar rampi ruahnak petu Daw Aung San Suu Kyi le President U Win Myint hna cu SAC nih kum caan saupi thongtlak ding in biakhiahnak a tuahpiak hna pin ah SAC uknak duh lo in a phunphun in dohnak a tuahtu ramkhel thongtla cu hmunkip thonginn ah 17460 leng an um tiah ramkhel lei thongtla zohkhenhtu Assistance Association for Political Prisoners (AAPP) nih April 12, ah cathanh a rak chuah.crd- The Chin Post.

Thawng thawng relchap – Ramthlo Khua Ah Bomb I Lamhsualnak In Nu Pakhat Nunnak Liam, A Pasal Nih Hliamhma Fak A Tuar, Chin ramkulh, Falam peng Ramthlo khuami nupa hna cu nihin April 17, ah lo an kalnak lam ah bomb an i lamhsual caah a nupi a nunnak a liam, a pasal nih a ke ah hliamhma fak a tuar tiah theih a si. A nupi Pi Ma San cu bomb i lamhsualnak in a hliamhma a fah tuk caah Falam kalpi ding in an timhtuah lio lampi ah a nunnak a liam, a pasal Pu Phun Ci cu a ke ah fak ngaiin hliamhma a tuar tiah theih a si.

Pi Ma San nih a pasal Pu Phun Ci le a fale 4 (fapa 3 le fanu 1) cu nihin April 17, ah a liamtak hna tiah theih a si. April 6, ah SAC ralkap nih Ramthlo khua inn 19 an khangh. A luancia kum lio zong ah SAC ralkap Ramthlo khuachung an luh hnu ah pastor pakhat cu lo a kalnak lampi ah bomb a rak i lamhsual caah a ke khatlei an rak tanpiak tiah theih a si.crd- The Chin Post.