Tlangcungmi nih mahte phunghrampi i suai ding timi kong hi a voilinak Union Peace Conference-21 Century Panglong ah i ceih ding in hnatlaknak an tuaah kho rih lo tiah State Counsellor office director U Zaw Htay nih a chim.
A voilinak 21 Century Panglong caah Union Peace Dialogue Joint Committee (UPDJC) meeting cu nihin August 17 ni ah Naypyidaw i MICC 1 ah tuah a si. An meeting ahhin 21 Century Panglong tikah iceih dingmi hnatlaknak 9 an tuah kho tiah State Counsellor Office in Director U Zaw Htay nih a chim.
Tlangcungmi nih an duhmi anmah le ramkulh nih mah tein phunghrampi i suai ding kong an ceih chih nain hnatlaknak an tuah kho rih lo tiah U Zaw Htay nih meeting dih hnu thawngfianhnak a chim hi a si.
Nihin ah tlangcung mi nih mah tein phunghrampi i suai ding ah NCA minthu hriamtlai phu nih an chuahpi nain an duh ning in a tling kho rih lo. A ralaimi meeting ah hi kong hi kan ceih than hrimhrim lai tiah UPDJC Vice President Dr. Lian Hmung Sakhong nih meeting dih hnu ah a chim. DVB nih a tarlangh.
Nihin Dr. Lian Hmung Sakhong nih meeting onnak Opening Remarks a chimmi cu NCA minthumi dihlak a aiawh kho lo i a bia hmangmi pawl ruah len ding an um tiah NCA minthumi aiawhtu palai pakhat a si ve mi U Naing Aung Ma Nge nih a chim.
Nihin tuahmi UPDJC meeting ah State Counsellor Daw Aung San Suu Kyi nih meeting onnak bia a chim i kan ram pumpi caah daihnak aa zuammi pawl nih kap hnih ca zoh chih in chimrel cio ding ah a forhfial hna ti si.
Nihin tuahmi meeting ah hin a ralaimi 21 Century Panglong Conference ah telh chih in hnatlaknak minsen thuh dingmi The Union Teaty Chapter 3 chung point pawl an ceih ti si.
Ref: DVB
Leave a Reply