TNLA Nih Sakhan An Laak I 38 An Tlaih Hna, Meithal 78 Zong An Laak Khawh

Lasho Peng Jayan Pyituhsit Sakhan Cu TNLA Nih An Laak I Pyituhsit 38 An Tlaih Hna, Meithal 78 Zong An Laak Khawh, Shan ramkulh, Lasho peng ah SAC ralkap kuttang rianṭuantu phu Jayan Pyituhsit sakhan cu TNLA nih an laak khawh i Pyituhsit 38 an tlaih hnannak kong cu TNLA nih an thanh. Nihin November 4, zinglei suimilam 5:30 ah Ta’ang ralkap PSLF/TNLA nih Lasho peng chung SAC ralkap kuttang Jayan Pyituhsit sakhan cu an laak khawh, tiah theih a si.

Jayan Pyituhsit sakan cu SAC ralkap pawl bawm in hriamnam an kuatnak hmun pakhat a si i SAC ralkap bawm ti lo ding in PSLF/TNLA nih ralrin an rak pek hnanak cu ngai lo in pehzulh in an bawmh hna caah atu bantukin Jayan sakhan an laaknak a si. Cu Jayan sakhan laaknak ah cun Pyituhsit 38 an tlaih khawh hna i cu chung ah Pyituhsit bawi 4 cu an hren rih hna, a dang 34 cu an thlah ṭhan hna, tiah theih a si. Sakhan chung ah meithal 78, zenkuan box 43, angles 218, speakers 21 le rithaisii fun 39 cu TNLA nih an laak khawh.

Thawng dang relchap- 1027 Operation Ni 9Nak Tiang Ah SAC Ralkap Sakhan 106 An Laak Khawh Cang, Shanram chaklei 1027 Operation kahdohnak a ni 9nak tiang ah SAC ralkap sakhan 106 cu chaklei hriamtlai phu unau thum nih an laak khawh cang, tiah MNDAA nih an thanh. Nihin November 4, zinglei suimilam 10:9 ah MNDAA nih Kokang peng Toneshan hmunram SAC ralkap sakhan 3 cu an laak chap khawh.

Cun Shanram chaklei Lasho peng chung Pyituhsit sakhan 2 le Namkham peng SAC ralkap sakhan 2 a zate ah sakan 4 cu PSLF/TNLA nih an laak khawh, November 3, chunhnu 2:15 ah Namkham peng SAC ralkap sakhan le Htingkan khua pawng SAC ralkap sakhan 2 zong PSLF/TNLA nih a rak khawh, tiah theih a si. Chaklei hriamtlai phu unau thum lak i phu khat AA hmunram chung ah kahdohnak a fak i, a hlei in AA an cawlcangh biknak ralhmun Sagaing ramṭhen chung Htichaingh le Kawlin kiangkap ah kahdohnak a fak khun, tiah theih a si.