August thla dongh lei ah tuah ding 21st Cetury Union Peace Conference a voilinak ah NCA min a thu rih lomi hriamtlai phu chungah AA telh loin phu dang phu 7 sawm dih ding in cozah lei nih fehternak an tuah cang tiah theih a si. BBC nih a tarlangh.
Nationwide Ceasefire Agreement (NCA) min thu rih lomi hriamtlai phu 7 hna cu anmah le an hruaitubik pahnih cio in sawm an si lai i midang aiawh a ngah lai lo tiah State Counselor Office Director U Zaw Htay nih nizan thawngfianhnak ah thawnglatu hna sin a chimh hi a si. Nain tlangcung hriamtlai phu hna nih cun hriamtlai phu dihlak sawm dih ding ah cozah an forh ve.
Union Peace Conference ah AA an sawm chih lomi nih ram pumpi buainak a chuahter kho tiah NCA minthu rih lomi United Wa State Army (UWSA) chimhnak nawlngeitu U Nyi Yan nih BBC ah a chim.
“Hriamtlai phu dihlak tel khawh ahcun a tlamtling deuh lai ka zumh. Conference ah AA a kai lo ahcun kanmah kan ram lawng fak a tuar ko lai. Zei si hmanh ah ramkhel kal ning tein itonnak le iceihtinak a um te lai tiah kaa ruahchan” tiah U Nyi Yan nih a chim hi a si.
Arakan ramkulh chungah cozah ralkap le AA kar kahdohnak a linsa chinchin i Kawl cozah nih AA cu tapung a si tiah 2020, March 23 ni ahkhan thawngthanhnak a tuah.
State Counselor Office director U Zaw Htay nih cun Conference kai ding mi hriamtlai phu cheukhat kan sawmh hna tikah upadi ning in rihkhiahmi a ngei tiah Naypyidaw i thawnglatu hna sinah a chim.
NCA minthu lo hriamtlai phu pawl sawm ding a si ahcun voikhat ah sawm dih lawlaw ding an si, cu si loin phukhatkhat sawm chih duh lo ahcun NCA caah zei thatnak hmanh a chuahpi kho lai lo tiah ramkhel lei thiamsang U Maung Maung Soe nih BBC ah achim. Hi bantukin AA sawm chih duh lo ahcun AA hawitha TNLA phu le MNDAA phu zong Conference an kai ve lai lo ti a fiang tiah a chim chih.
NCA minthu rih lo an si caah Conference kai sawhsawh lawng a si ahcun zeihmanh thathnemnak um lo kho. Nain 2020 kum chungah chaklei hriamtlai phu phu 4 he NCA minthutnak le ton biaruahnak kong pawl cu tutan Conference kainak ah iceih chih khawh a si ahcun hmai lei caah lam aa on kho tiah U Maung Maung Soe nih a chim chih.
NCA min thu rih lo hriamtlai hna cu Kachin Independence Organization (KIO); Mong La tiah theihmi National Democratic Alliance Army (NDAA); Shan State Progressive Party/Shan State Army (SSPP/SSA); Karenni National Progressive Party/Karenni National Army (KNPP/KNA); Ta’ang National Liberation Army (TNLA); Kokang tiah theihmi Myanmar National Democratic Alliance Army (MNDAA) le Arakan Army (AA) hna an si.
Union Peace Conference 21st Century Panglong A voilinak meeting cu Naypyidaw khualipi ah August 19 in 21 tiang tuah asi lai tiah theih a si.
Ref: BBC
Leave a Reply