Tulio Hakha Thawng Pawng Electric Mei Kong

Hakha Ah Electric Mei Caan Hmaan Tein A Rat Lonak Zarh Khat Tluk A Si Cang, Chinram khuapi Hakha khuachung ah electric mei caan hmaan tein a rat lonak zarh khat tluk a si cang, tiah Hakha um mi hna sinin theih a si. SAC nih nawlngeihnak an laak hnu in kum khat leng chung cu chunzan in electric mei an rak pek ko nain a hnu deuh cun SAC kuttang electric zung nih Hakha khuachung ah caan rikhiah in mei an pek. Sii-inn pi lei a kalmi line paoh cu mei an hmit lo nain dawr thar sang lei line a kalmi paoh cu rikhiah in mei an pek, tiah tualchung mi pakhat nih.

The Chin Post ah a chim. Dawr thar, Cawbuk sang lei kap line paoh cu zing suimilam 9:00-12:00 kar mei an rak pek i 12:00-3:00 kar an hmih. Zanlei 3:00-zing 9:00 tiang an pek ṭhan. Cu bantuk in mei an rak peknak hi caan sau ngai a si cang. Cu hnu ah zing suimilam 9:00 in chun ni tlak le zan khuadei electric mei an van ṭhan i zing suimilam 6:00-8:00 kar an hmih ṭhan tawn. Asinain atutan mei an pek ning cu hngalh khawh a si ti lo.

An duh ah an van an duh ah an hmih lengmang, tiah tualchung mi pakhat nih cun a chim. Hakha um mi nih cun, rawlchuannak ah electric mei cu an hman ngai mi a si i, rawlchuan caan i mei an ngeih tawn lo caah laklawh ngai in an um tawn kong an chim. Thawng dang relchap- Myingyan Ah Ralkap Thazaang Chap Dingin A Ra Mi SAC Ralhrang Motor 2 An Kah 7 An Thi, Hliamtuar An Tam, Mandalay ramṭhen.

Myingyan peng ah ralkap thazaang chap dingin a ra mi SAC ralhrang motor 2 bomb puahhnawh in an kah motor 1 aa rawk, tiah Red Dragon Guerrilla Force (Myingyan) in ṭuanvo ngeitu pakhat nih a chim. January 17, zing suimilam 11:30 tluk ah Natogyi peng, Phaungchi khua pawng ah SAC ralhrang le mipi ralkap karlak ah kahdohnak a chuak. Cu kahdohnak hmun ah ralkap thazaang chap dingin motor 2 he a ra mi.

SAC ralhrang thazaang 30 tluk cu mipi ralkap nih bomb puahhnawh in an rak kah hna caah motor 1 aa rawk tiah People’s Spring Media nih a langhter. Bomb puahhnawh kahdohnak ah SAC ralhrang 7 an thi, hliamtuar an tam, motor 1 aa rawk, drone 1 le meithal kuan zeimawzat kan laak” tiah Red Dragon Guerrilla Force (Myingyan) in ṭuanvo ngeitu pakhat nih a chim.

Leave a Comment

Leave a Reply

Your email address will not be published. Required fields are marked *