Hakha Sizung in Inndawng 115 nih an Umnak an Chuahtak, Nihin Hakha sizungpi in rianttuantu minung 315, inndawng 115 nih an umnak Quarters an chuahtak. Ralkap nih an tthawl hna lio mizaw zual 30 zong an um,” tiah Hakha sizung uk Dr Mang Biak Kung nih a langhter.
Ralkap nih an pawnchuah hna lio ah sizung rianttuantu pawl tthialkaam a bawmtu Hakha mino cung ah kan i lawm, tiah Dr. Mang Biak Kung nih a langhter i, Hakha sizungpi hi mipi kut a phak tthan nakhnga kan i zuam hna lai, tiah forhfialnak bia zong a chim chap, crd- The Chin Journal.
Ca dang rel chap: Kue ruahnak tang cun fawi dawh si lo. Riatriat hnu in Kawl ralkap uknak le ramchung ramleng dohthlennak cawlcanghnak kong mifimthiam tampi nih an rak kherhlai. Ralkap a rak hua tuktu Riatriat pawl cu an huat tukmi ralkap pawl ziaza an ingeih beh ve tiah an ti. Kawlram chungah caan zeimawzat khuasa bal Christina Clapp tehna zong nih cutin an rak hmuhchuah. 2021 GenZ chan ah ralkap huatnak fak deuh in a chuak hlah maw ti awk in a um.
Social media chan a si caah mi hrihhawhnak le huatnak bia cu cikhat ah zapi sin a hlanh khawh colh lengmang. Dohthlennak cu caan sau a von rauh tikah, an thin sau cio ti lo. An doh takmi hei pah chih dingah le lungpi cal in va suk ding phun he aa lo fawn. Huatnak he ral doh an duhnak he an doh duhmi an doh khawh lo tikah an iing a puang. Khi tikah, aa fon aa buu dingmi phu pawl khi ifonh ibuut loin iṭhen iṭheek viar chinchin an rak si tawn.
Riatriat pawl kha, dohnak an rak thawkka cun, brotherhood hei ti phun in an rak um. Nain, a hnu ah, anmah tein an rak iṭhenṭhek viar. Tutan hi ralkap nih “guerrilla warfare” phun in a tongh hna. Voi khat hrawh ah hrawh aa tim lo ti a lang. Mipi leikap cun online Cele cheukhat nih dohthlennak hmual an hrawh ngai ti in hmuh khawh an si. Lih a phunphun in mino thinlung ah siivai an ronh. Thawng diklo in an lung thawhter an zuam hna.
Cu pah cun, Social Punishment an ti i fiang in an theih set lomi, dai te um komi zong sual an phawt hna. Palik nih an rak kah hmasa bikmi nute kaptu pa fanu a si an rak timi in palh hram an rak ithawk. Mi kappa fanu tiah heh tiah an izamh i an pamh. A rak si lo. Maelung fanu a si an ti, ai dawh ngangmi nu an chuahpi. Cu ralbawipa fanu si an ti. A si lo le si lo an thlir hna i an volh an pamh hna tikah, an thazaang a der chin lengmang.
Ram pumpi minthang pakhat tehna an ithlir tikah, cu minthang pakhat nihcun dawtu tam tuk aa rak ingeih ve ti an tuak kho lo. Palik le ralkap sin i an tlaihmi meithal kan ifim lai maw, kan hman ve lai dah ti hrawnghrang ah an buai peng rih. Dohthlennak an tuahmi kong ah a fekmi biakhiahnak zong um rih lo, Strategic Planning pakhat hmanh um lo ti a lang. Kam khatlei ah, ralkap nih CDM doh-au phu cu kar khat hnu kar khat in khuaihmal diahmah a timh hna.
An hrihhram in a zawt. NLD HQs a nam. Daw Khin Kyi Foundation a nam. Kyaw Thu te phu a nam hna. Cu dih ah, ramdang in phaisa kuatnak tuahtu dollar thleng pawl a nam hna. Ral ituknak ah rawl-ruk cu a biapi tuk. Ralkap nih CDM leikap rawlruk hrawh hmasa aa tim. Kawlram aa thlen khawh taktaknak dingah cun Kawl mipi an biapi ngai. An mipi lakah ralbawi zik pa an thah khawhnak ding ruahnak luhter a hau.
A luzik a hngawng an pheh cun, mi vialte thisen luanter zong hau hnga lo, mi tampi harnak kan tong hnga lo. Cu bantuk ruahnak an ngeih khawhnak ding an thisa ah ruahnak luhter a herh. Crd-Salai C Alexander
Leave a Reply