Tutan Cu A Minung Zoh  In Thim Ding Nan Ti Maw

By-Ram Tinthei: 2015 – 2020 karlak MP Salai Siangawr Vanhnin le MP Saya Ngun Hei tlukin kan Laimi chungah a personality, a character a thami le fimcawnnak ah aa zami an tlawm taktak. University Lecturer an si bu ah kan miphun caah tampi cawlcanghnak a ngeimi an si. MP Dr. Hmuh Thang le MP Pu Van Thawng nakin kan miphun chungah fimcawnnak ah siseh, hmuhton ah siseh, miphun rian ah chuahpi ngam dingmi minung kutdong in rel khawh an si lai.

Kum 5 chungah khoital ah nan hmuh in biatung an dirh? MP an si le silo hmanh a hngallomi an tamtuk. An aiawhmi mipi sinah tlawnkainak le hmuhtonnak a umlo tluk asi. Naypyidaw i University a herhnak kong hna dawkaw an chimter salam hna kha mu. Kan pale kan upat ko hna. Soisel siloin, kum 5 chung an cawlcanghnak kha langhter duhmi asi.

2013 i Hakha ah tuahmi Chin National Conference, 2017 ah tuahmi Chin National Dialogue ah Chin miphun vialte tonpumhnak le ramkhel kong ceihkhan tinak a um. Chin Parties pawl nih an biatung an chuahpi cio, nain Kawlrawn party i kan pale tampi cu chuahpi ding an ngeihlo hlei ah, chuahpinak nawl an ngeihlo caah khual bantuk ah an ichuah.

Atulio hi “transition period” asi i Party Policy hi kan zoh taktak a hau. Kawlrawn Party hna an policy tangah kan Chin MP kan pale anih anih timi pawl an cawlcang kholo, an chim duhmi hmanh anmah nawl in chimnak nawl an pe hna lo. Miphun le mipi aiawhtu lawhlo in an Party aiawhtu ah an ichuah.

Cu caah tutan cu; Chin Miphun caah kan Chin miphun nih sermi policy, cu policy ningin rian a tuan dingmi le Chin miphun a awiawhtu MP hi thim ko hna usih. Chin miphun a kan aiawh khotu Chin Party ah ifun ko hna usih.