Delhi Chin Ralzam Community dihlak cu Chin Refugee Committee (CRC) ah lungrual tein, hmunkhat te ah um ding in le cawlcangh ding in minsen thutnak tuah a si cang. May 6, 2020 ah Delhi hram bunh Chin ralzam Community dihlak chungin hruaitu lutlai a simi hna, President, Vice President le Secretary hna cu hmunkhat te ah ton biaruahnak ngeih tthan a si. Nihin ah Delhi Chin ralzam Community ai-awh cio in a rak chuak mi hruaitu upa dihlak nih Chin Refugee Committee (CRC) ah lungrual tein um ding, hmunkhat te ah rianttuan cang ding in le chiatnak, thatnak kong vialte ah siseh.
Chin ralzam he aa pehtlai mi cawlcangh nak paoh cu CRC min in kan cawlcang cang hna lai timi lungtlinnak tuah in minsen thutnak he fehternak zong tuah a si. Nihin ah Delhi Burmese Pastor Fellowship zong nih an kan tel pi pin ah Rev. Sui Nei Piang, Rev. Ning Khan Do, Pastor Hram Bik Lian hna zong nih minsen kan thutnak ah theihpi tu dirhmun in an kan tel pi khawh ve. CRC hi kum 1996 January Ni (14) ah rak dirh a si i Chin Community dihlak CRC ah rak um dih a si.
A sinain a luancia caan zeimawat chung cu CRC ah Chin ralzam Community dihlak chungtel tling in rak um a si lo. Sihmanh sehlaw nihin kan dirhmun le Chin miphun kan boruak cuanh tikah a dang in cawlcangh le khuakhan caan a si ti lo, hmunkhat te ah lungrual tein kan cawlcangh a herh cang timi ruahnak he Delhi Chin ralzam community dihlak hna nih CRC ah um cang ding in khuakhannak ngeih a si i nihin ahcun lungtlinnak minsen thutnak zong kan tuah cang hi a si.
Tutan ah Chin ralzam community upa dihlak nih fek ngai in an langhter chih mi cu “Delhi Chin ralzam kong he aa pehtlai mi Chin huap cawlcanghnak paoh cu CRC min lawng in si cangseh” tiah biahren an tuah lawng si loin, pumpak le zeibantuk Bu dang hmanh nih Chin min zuar in Chin ralzam caah cawlcangh lo ding ti hi asi. A tanglei kan rak langhter mi minsen thutnak hna hi nihin ah Community ai-awh cio in minsen thut mi catlap cu a si. Za Cung Lian, President; Chin Refugee Committee (CRC) Delhi.Credit; Crc New Delhi Crc.
Leave a Reply