Malaysia ram cu 1951 Refugee Convention ah min a thut mi ram a si lo caah an ram nih ralram caah policy an ngei lo hlei ah ralzam hna vialte zong hi an ram upade ah cun phung ning lo in a um mi ramdang mi tiah zoh dih a si. Mah ruang ah UNHCR nih Malaysia cozah sin ah Refugee Convention ah min thut in member si ve hna seh ti a duh caah a lem leng mang ko nain Malaysia cozah nih cun minthut a duh ve hlei lo.
Mah ka zon ah hin UNHCR caah cun an i timh mi thil hi ngah a fawi lai lo ti ah ka ruah. A ruang cu a luan cia 2018 kum Ah International Convention pakhat a si mi “Miphun Thleidannak Hlawtnak” ti mi “International Convention on the Elimination of All Forms of Racial Discrimination (ICRD)” ah Malaysia cozah nih an ram chung (Malay, Tuluk le India) hna caah hnatlaknak minthut ding mi hmant an ram chung mipi lila nih an duh lo caah minthut lo in an um than. Mah long si lo in kum 2019 ah Rome Statue of ICC in an chuak rih.
Mah hna zoh tik ah International Convention a si mi 1951 Refugee Convention ah min thut in refugee a cohlang mi ram pakhat va si ve ding cu Malaysia cozah dir hmun ca cun a fawi lo.
Na tein, UNHCR nih I uah lo tein UNHCR nih hin Ralzaam pawl caah an ruah taktak a si ah cun An Mah nih an hman mi Ralzaam Upadi lawng kha I tlaih lo in Malaysia Cozah sin ah Malaysia um ralzaam pawl hi cohlang ding in Malaysia Cozah sin ah nawlnak fakpi in tuah kho a si ko.
Zei ruang ah ti si cun Malaysia nih phungning lo in um mi ramdang mi hna cozhlang kho nak upade an mah nih tuah mi an ngei ve cu ta. Mah upade cu “Immigration Act 1959/63” i “Pohma 55 (C)” hi a si. Mah pohmah hi Malaysia nih hman lo in ah chiah mi upadi a si I mah upadi hi cozah nih a hman ah cun ralzaam le phungning lo in a um mi hna caah him nak ngah kho mi a si.
A si na tein, UNHCR cu international organization pakhat a si ve tik ah a um cia mi upade (existed law) kha hman ding in nawl nak tuah lo in an mah international upade chung lut ter ve hna I hlawhtlinnak kan ngah tiah min that an duh ve deuh caah an mah international upade hlei in a um cia mi upade ning tein an hal duh ve lo. Cu tik ah a Cozah zong nih cun international convention ah min thut ah cun ralzam caah upade le policy a thar sar than a hau than hlei ah tuanvo tampi lak ding a si tik ah international upade hi an zul duh ve lo.
UNHCR rian tuan ning zoh tik ah khual tlawng lio mi mi Pakhat nih lamtan ah tluninn ngah khoh ve nak ding caah inn ngei sin ah va nawl si lo in inn ngeitu tu kha ka inn ah rak I thial law ka sinah rak um ve tiah lamtan in sawm mi he aa lo. Mah ruang ah UNHCR an I uahnak le Malaysia cozah lungkhawng nak tang ah ralzam pawl cu I tenh peng rih a si ko lai.
Credit: James Bawi Thang Bik
Leave a Reply