US Citizen Mi Sinak In Chuah Le Hlawt Timi Hi Thil Fawi A Si Lo

US citizen sinak le Dr. Ngun Cung Lian; Dr. Ngun Cung Lian cu US rammi sinak lak piak than dingin an nawl ko nain US cozah sin ah a phan lo. Mi tampi nih US nih a kong ceih seh ti cu kan duh dih ko nain cucu a har ngai mi thil a si. A ruang cu US citizen mi sinak in chuah le hlawt timi hi thil fawi a si lo.

US ram chungah buainak maw, US constitution he pehtlai in nawl a buar dah ti lo ah cun rammi sinak in hlawt khawh a si lo. Ram dangah sualnak a va tuah sual si ah cun a sual a tuah ram nih an ngeihmi phungning tein dantatnak pek khawh a si. Tha tein kan ruah thiam a si ah cun a tuhi Dr Ngun Cung Lian hi Myanmar rammi sinak citizen lak cang sehlaw thei lo a si, crd-chin morning star news.

Thawng pang dang relchap; Aibur Khuami 3 an Tlaih hna Hnu ah Ralkap nih Aibur Khuami pawl Zenthong an Apter Hna, Thantlang peng, Aibur khuami minung pathum ralkap nih an tlaih hna i, an phone chung ah zenthong hmanthlak an hmuh caah Aibur khuami pawl cu ralkap nih zenthong an apter hna, tiah thawng kan theih.

Aibur khuami Duh Hu Thang le Tin Maung cu April 12 ah Thantlang in Hakha lei an rat lio ah Hakha khualuhnak checkpoint ah an tlaih hna. Cun, motor mong a simi Sang Maung zong April zarh khatnak ah ralkap nih an rak tlaih. Zei ruang ah an tlaih timi theih a si lo. An tlaihmi minung pathum lak ah minung pakhat i a phone chung ah zenthong hmanthlak pawl an hmuh caah cu zenthong pawl cu ap ding in ralkap nih Aibur khua upa an fial hna.

Cucaah, nihin April 15 ah Aibur khua pastor pakhat telh in minung pathum nih Thantlang penguk zung ah cu zenthong pawl cu an vung ap. Aibur khua upa pakhat nih, “An tlaihmi minung pakhat phone chung ah zenthong hmanthlak an hmuh caah zenthong rak ap uh tiah khua lei ah phone a rak kan chawnh. Nihin ah Pastor pakhat telh in minung pathum nih cu zenthong pawl cu Thantlang penguk zung ah an vung ap,” tiah The Chin Journal ah a chim.

Khuami nih cun zei zenthong hmanh kan i chiah lo, mah zenthong pawl hi khoika an cawk ti zong kan thei lo, tiah ralkap sin ah Aibur upate nih an chim. Zenthong apnak ah Hakha Runtlang ralbawi Col. Zaw Min Tun zong Thantlang ah a kal ve, tiah kan theih,crd-The Chin Journal.

Leave a Reply

Your email address will not be published.