USDP le Ralkap nih Union President an tlaih khawh nakhnga caah State le Region Chief Minister hmun An Zuar i CNLD nih cawk ding in an bawh. Cucu 2020 election nih a timhmi “Coalition” cu a si. Okay, zeitindah a si lai?
NLD nih Cozah ser khawhnak MP 333 cu an hmuh hrim lai tiah ka zumh. Asinain CNLD nih “Coalition” a um te lai tiah an hnabei a sei tuk caah, “Coalition” hi chuak tak sehlaw zeidah a cang kho timi 2020 Politics ah Centre issue ka ttial lai.
A konglam in thawk ning law, Kawlram election system cu “First Past the Post” an ti i mipi nih MP cu simple majority in an thim i, Mipi nih thimmi MP vialte hna nih President an thim tthan. Cucaah, phundang in chim ahcun Mipi/mizapi nih President a thimtu ding MP an thim hna i, MP nih President an thim tthan caah Kawlram President thimnak cu, “Electoral College system” tiah hngalh a si.
Mizapi lei nih MP an thim dih hnu ah Pyithu Hluttaw in President caah pakhat an chuahpi lai. Amyotha Hluttaw in Pakhat an chuahpi ve lai i, Ralkap lei in Pakhat an chuahpi ve lai. Cuticun, Pyithu, Amyotha le Ralkap in chuahpi ciomi minung 3 chung in MP 664 nih President cu an thim lai i, Vote tambik a hmutu nih President a ttuan lai. Cun, President nih Cabinets a dirh lai caah President a tlingmi Party kha Cozah sertu Party an si ko lai tinak a si. Ralkap lei in chuahpimi hi, President ah an tlingter sual ahcun, Ralkap nih Cozah an ser lai tinak a si. Cucaah,
2008 phunghrampi cu ralkap le USDP nih Cozah an ser khawh peng nakhnga, “Coalition” a um khawh peng nakhnga sermi system a si. Ralkap nih 25% an lak cia i, USDP nih 25% + MP pakhat an hmuh ahcun fawite in anmah duhmi President thim khawh peng dingin an saduhthah a si. A dang party vialte nih 50% + MP pakhat an hmuh lawng ah anmah duhmi President an thim khawh lai. Cucaah, 2008 phunghrampi nih aa timhmi cu ralkap 25% seats le section 261 zoh chih in a fiang bakmi cu Union President a si ah, State le Regions Chief Minister an si ah, Ralkap le USDP nih tlaih peng ding hi a si.
Asinain 2015 election ah NLD nih Landslide bak in a tei hna tikah ralkap le USDP cu an lau. An saduhthah ning in thil a kal ti lo kha an ifiang. Cucaah, 2020 election ahhin USDP nih 25% + MP pakhat hmuh ding hi an hnabei a sei ti lo. 2015 election lio ahkhan 9.1% te lawng an hmuh. Asinain 2020 election ahcun tam deuh an hmuh ding hi an iruah ve lai.
Cucaah, 20% an hmuh khawh ahcun 6% MP hi tlangparmi sinah Chief Minister hmun zuarnak in an cawk khawh ahcun USDP chung a President a silo ah ralkap in chuahpimi hi President ah tlinter khawh ding hi an iruahchihmi a si. Cun, pahnihnak ah Union ah President an tlaih khawh lo zong ah State le Regions tal ahhin ralkap le USDP nih Chief Minister an tlaih khawhnak ding caah lampi awn/open an duh. Mahhi tulio section 261 Politics nih aa timhmi a si.
A si lai lo nain, hei si sual sehlaw:) 2020 eelction result ah NLD Nih 40% hmu hna seh, USDP nih 20% hmu hna sehlaw, a dang tlangpar parties le dangdang nih 15% an hmuh ahcun, Coalition timi hi a um kho. USDP nih 20% an hmuh ahcun ralkap nih an ngeihmi 25% he an ifawnh ahcun 6% te lawng an herh. NLD nih 11% a herh ve lai. Cucaah, anmah parties le parties karlak ah isawmnak, internal politics dealing ituahnak a chuak kho. USDP nih State le Regions ah Chief Minister hmun hi an zuar cang caah, mahhi fakpi in tlangparmi Parties soilemnak ah an hman colh te lai. Okay, hibantuk dirhmun chuak sual sehlaw CNLD dirhmun zoh hnik usih.
CNLD lei in Pu David Ngaisak tling seh. Pu No Than Kap zong tling ve seh. CNLD nih an itimhmi cu coalition chuak sehlaw Chief Minitser an tlaih khawh dingmi a si fawn tikah USDP le ralkap nih anmah Union President tlinter in State le Regions ah Chief Minister hmun an zuarmi hi an cawk lai maw? Coalition dirhmun a phan ahcun CNLD Party hi issue 3 in buainak a chuak kho.
1nk ah Union President caah Ralkap or USDP vote pek in anmah nih Chin State ah Chief Minister tlaih cu an ithlachiat lai. Cun, Cheif Minister tlaih khawh dingin lam aa awng sual hman ah Pu David Ngaisak a duhmi le Pu NO a duhmi karlah ah an buai rih lai. Cucaah, CNLD cu tling ve ko hna sehlaw, strong opposition tu in an um hi tthat cem dawh a si.
Note: CNLD nih an saduhthah ning Coalition hi hei chuak sual sehlaw anmah caah buainak/problem nganpi chauhtertu a si kho. Cucaah, NLD nih simple majority in a tei ahcun aho ca paoh ah a ttha hnga. Politics kong a lung a lutmi caah thil si kho umtuning ka von thaimi a si.
Credit: Zasang Cinzah
Leave a Reply