A tutan Kanram Vice President Pu Henry Van Thio Chinram chaklei a kan tlawn cu Thantlang khua caah cun thawngtha taktak lunglomhnak ngan taktak a kan phurh. Amah kan pa Pu Henry Van Thio he a rak kan tlawng mi hna cu ramkomh fimcawnnak lei vuanci le vuanci zung dang in Deputy Minister minung 3, Director General minung 3, Deputy Director minung 1 le Permanent Secretary minung 2 hna an si.
Lunglomh nak: 1nak, Thantlang khua chung Pawhte rawn ah sak cuahmah lio mi Government Tecnical High School (GTHS) sianginn cu ara lai mi 2021-2022 cacawn kum ah on khawh ding in timh tuah lio pi a si. Hi GTHS sianginn hmanh kan ong rih lo nain Vice President Pu Henry Van Thio thawng le fimcawnnak lei ramkomh vuanci a si mi Dr. Myo Thein Gyi cung ah le
Atu lio Hakha GTI sianginn ah Principle a tuan liomi Dr. Tluang Za Thang an dihlak hna thawng in GTHS siang (High School Siang inn in Diploma sianginn ah Government Technical and Vocational Institute (Thantlang) GTVI tiah a kan pek than. Kan i lawm hringhran. GTHS sianginn in a dih hnu ah hin GTVI sianginn ah hin Diploma peh khawh colh ding a si.
2nak, Thantlang khua ah nihin tiang kan hmanmi Maha Dat Aa-line (National Grid) electric mei hi 11 KV line lawng in pek kan si. Vice President Pu Henry Van Thio zuamnak thawngin 66 KV line pek kan si i 2019-2020 phaisa kum ah hin 66/11 (KV) 5 M (KV) Dat khuai zung (Substation) cu Kyat Sing 8920 (892.000 million) dih in Thantlang khua hlun hauka bung pawng ah sak cuah mah lio a si.
2020-2021 phaisa kum ah Hakha in Thantlang 66 (KV) line cu hri zamnak caah Kyat Sing 10000 (One billion) pek kan si. Hnaring myo thar zong 2021-2022 phaisa kum ah National Grid (Maha Dat Aa Line 11(KV) in tuah piak an si ti zong a chim chih.
3nak, Hakha Thantlang Saisih chuak lam cung ummi Tipi (Kaladan tiva) hlei donhnak kong si. Mah hi hlei donh ding mi hi asau pe (500) in donh timhmi si. Ram pahnih pehtlaihnak hleipi a si caah hin a process hi a kal a fum ngai.
Asinain Vice President zuamnak thawng le hluttaw kan pa Pu Bawi Khing hna zuamnak thawng in aralaimi 2021-2022 phaisa kum ahcun donh hram kan thok khawh lai tiah zumhnak ka ngei ko tiah Minister of Construction ah Permanent Secretary a simi U Shew Lay nih a chim. Hi hlei donh ah hin India cozah nih Dollars 2 million le Kawlram cozah nih Dollars 1. 5 million thawh ve in donh ding a si lai ti ah a chim.
4nak, Thantlang khua mipi nih dinti duhdim tein kan hmuh khawhnak ding caah Vice President Pu Henry Van Thio le Chin ramkulh cozah bomhnak in Kyat 2.9 billion dih in ti lak a si i nihin ni ahcun duhdim tein ti kan hmang. Ti khonnak inn (Zi Kan) Gallons 150000 a tlummi pakhat cu Thantlang khua lu asannak bik Far hual bo ah sak a si i ai lim cang. Gallons 100000 a tlummi pakhat cu Thantlang Palek Sakhan bo ah sak cuahmah lio a si.
Cu lawng cu a zalo a ti i Gallons 50000 a tlummi saknak ding caah Kyat sing 600 Vice President nih a kan pek than. Siizung kam ah sak ding si tiah ramkomh electric lei Deputy Minister U Khin Maung Win nih TBC Hall mipi he tonnak ah a chim.
Kawlram pumpi ca le Chinram caah chunchun zanzan in khua a ruat peng mi, a hlei khun in Thantlang khua caah khua a ruat peng mi kan pa Vice President Pu Henry Van Thio cung ah kan i lawm tuk. A riantuan tti hawi le cung zong ah kan i lawm tuk. Pathian nih umpi in lam hruai zungzal ko seh.
Credit: Ram Khar
Leave a Reply