YDF Nih AA He Ral An Dohṭi Nakkong A Langter

Yaw Defense Force (YDF) cu Rakhine ramkulh chung le Chin ramkulh, Paletwa peng chung um SAC sakhan laak kahdohnak hna ah Rakhine ralkap AA le MDF hna he hmunkhat ah an dohṭi nakkong 2024, January 12 ah cathanh an chuah. A taang rih caan chung zong ah SAC ralhrang sakhan laak kahdohnak ah pehtlai in kan i tel peng rih lai, tiah an langhter chih. Aluan ciami caan ah SAC ralhrang nih umhmun an khuarnak Taungsii sakhan laak kahdohnak lio ah a dang hriamtlai phu cheukhat in mizapi ralkap hna zong raltuk cawn pah ah tiin kan sinah lungtho ngai in an i tel hna, tiah Rakhine ralkap AA nih thawng an rak thanh.

Taungsii sakhan laak kahdohnak cu zarh 3 chung a rau i 2024, January 6 ah cu sakhan cu kan laak khawh. Sakhan kan laak khawh tiang YDF phu cu lungtho ngai in an i tel, tiah an langhter chih. Yaw Defense Force (YDF) cu Yaw miphun hna kilven ding le Myanmar ram mizapi hna nih SAC ralhrang kuttang in kan luat khawhnak ding caah tiin 2021, May 12 ah Yaw miphun mino hna nih dirhmi phu a si i mizei phu kutttang hmanh ah um lo in a ṭhawngmi thinlung ruahnak he dirhmi phu a si, tiah YDF nihcun thawng an thanh.

2023, December zarh 2nak ah Rakhine ramkulh, Kyauktaw peng, Taungsii SAC sakhan laak kahdohnak ah Yaw Defense Force (YDF) cu ṭangṭi phu hna he hmunkhatte ah raltuk cawn pah ah ralṭha ngai in aa telmi kan si. Atu bantuk in raltuk cawnnak le kahdohnak ah a kan telhtu Rakhine ralkap AA cung ah lunglawmhnak tampi kan ngei” tiah Yaw Defense Force (YDF) nih thawng an thanhmi ah an langhter chih. Thawng dang relchap- TNLA Nih An Ukmi Khuapi 7 Ah I Ukhruainak Thar An Thawk.

1027 Operation kalpi a si hnu ah TNLA nih an laak i an ukmi khuapi 7 ah tlangcung mi thleidannak um lo in i ukhruainak thawk a sinak kong TNLA Chairman Tar Aik Bong nih a chim. TNLA nih Shan ramkulh chaklei ah an uk cang mi Namhsan khuapi, Manton khuapi, Namtu khuapi, Mongngawt khuapi, Monglon khuapi, Namhkam khuapi le Kutkai khuapi hna ah i ukhruainak thar thawk a si cangnak cu nihin January 12, a voi 61nak Ta’ang dohthlen ni tonpumhnak ah TNLA Chairman nih a chim.

Tualchung mi le tlangcung mi thlendannak um lo in a dik mi phunghram cu a biapi bik ah chia in a fekfuan mi phunglam ser in humhimnak le i ukhruainak thar cu a tak in kalpi a si cang,” tiah Lieutenant General Tar Aik Bong nih cun a chim. TNLA Chairman nih cun, “SAC ralkap nih vanlawng hmang in bomb an thlak ruang ah TLNA nih khuapi an laak mi chung in a rawk mi inn remh ding cu papek a si lai caah ramleng a phan mi Ta’ang mino vialte hna zong chuahsemnak ah hung kir in hmunram ṭhanchohnak le sersiamnak rian ah i tel ve u,” tiah forhfialnak bia a chim.

Chaklei hriamtlai phu unau thum nih an kalpi mi 1027 Operation nih aa tinh mi bantukin ralkap nawlngeihnak a hrambongh, mizapi humhimnak laakpiak le hmunram cio ukpen khawhnak ca ah dohthlennak ah aa telmi mizapi he kahdohnak kan pehzulh lai, tiah a chim chap. Cu pin ah, phu khat harsatnak cu kan zate harsatnak a si bantukin phu khat teinak cu kan zate teinak a si, tiah TNLA he ṭangṭi MNDAA le AA nih cathanh an chuah ve.

Chaklei hriamtlai phu unau thum nih 1027 Operation an kalpi hnu in Shan ramkulh chaklei ah TNLA nih khuapi 7 an laak mi telh in chaklei hriamtlai phu unau thum nih khuapi 16 an laak khawh cang. Cu pin ah Rakhine ramkulh le Chinram, Paletwa peng hna ah Rakhine ralkap AA nih sakhan laak ding in kahdohnak an kalpi cuahmah ve.

Leave a Comment

Leave a Reply

Your email address will not be published. Required fields are marked *