Pago ramthen, Pyi district, Paungtee myone, Nyaungkapin oksu, Paukhmaw khuami nuva pahnih hna cu an inn chung teah hri pakhat in an i awk i an nunnak an i lak tiah Paungtee myoma police station inn theih a si.
Thil sining cu Paukhmaw khuami Kyaw Linn (kum 33) le Ma Sanda (kum 39) hna nuva cu tilam kam i an lekuang chungah sakmi an inn chungah a luancia nithum hrawng ahkhan hri awk in an thi i, nihin August 23, zinglei suimilam 11am hrawng lawngah a naupa nih an inn chung a va zoh cun an ruak rawk ngai in a hmuh hna tiah Paungtee myoma police station in Sakhanhmu, Duh-yehmu Myint Thein nih a chim.
“An nuva kar biaalnak a chuak i an nuva in hmunkhat ah kan i thah lai ti hna sehlaw aa dawh. An pahnih in an hngawngah hri an i tem i an inn pithlung ruapum cung ah i thlai hna dawh an si. A pasal cu a thu buin a thi i a nupi cu zeltuang in pe khat hrawng aa cawi in aa thlai. Kan theih hmasat hi an naupa nih an inn tang ar tlaih ding a va kalnak ah a hmuh hna” tiaah Sakhanhmu, Duh-yehmu Myint Thein nih a chim hi a si.
A thimi hna kong he pehtlaih in an pawngkam mi hna nih an chimh ning ah phaisa lei le pakhat le pakhat buainak an ngei bal lo i an pasal tu hi zu a din pah tawn nain a nupi cungah a kut a thlak bal lo, tutan an si ning he pehtlaihin a chimh awk kan thei lo an ti ti si.
“Ka tupa hi a luancia nili, khua chung a rat hnu in ka hmu bal ti lo. A naupa nih an arhli a va zohnak ah a hmuh hna hi asi. Buainak an ngeihmi ka thei lo. An buai ruangah an i awkmi a si ahcun ka thei ve lo” tiah a thimi pa a pu, Paukhmaw khuami Ko Zaw Naing Oo nih a chim.
A thimi nuva hna an ruak pum hi a puah dih cang i post mortem tuah ding in Paungtee myone, cozah siizung ah an kuat tiah theih a si.
Source: Myaelat Athan; Photos: Wai Linn Htun
Leave a Reply