Herodotus nih, “There is nothing permanent except change” a ti. Thlennak dah ti lo cu a hmunmi thil an um lo. Cucu kan hngalh ciomi asi ko nain harnak pakhatkhat kan ton tikah cucu a hmun tiah kan ruah caah si lem loin kan ton cuahmah mi thil cungah lungdongh in kan um caan a um theu tawn. “Covid-19 hi a karh ti lai lo maw?. Phungchimtu 3: 1- 8 chungah “Zeipaoh nih hin Caan an ngei cio” timi kha kan rel tawn ciomi asi ko lai dah! (Rel than te hmanh, atu kan ton cuahmah mi sining (Covid- 19) lakah tampi ruahchannak an pek lai!) A hlan ahcun “raifanh zawtnak (malaria) hi mikip nih ttihmi zawtnak arak si” an ti. Atu lio covid-19 zawtnak bantuk arak si tinak asi lai cu! Sii an rak hmuh hlan ahcun mah raifanh zawtnak ruangah arak thimi an tlawm ve lai lo.
Asinain mifim thiamsang hna nih mah zawtnak ca I sii an ser khawh tikah cun atu ahcun malaria zawtnak cu zawtnak phunkhat sasawh ah ruah asi cang. Cu ve bantukin Covid-19 zawtnak zong hi atu lio ah mikip thinphan thlalau lengmang in kan tuah hmanh sehlaw ni nikhat ahcun sii an ser khawh te tik ahcun zawtnak phunkhat men ah a cang te ko lai ti hi kei ka zumhning asi. Kan biatlang pi ah “Covid-19 hi a karh ti lai lo maw?” kan ti tikah a karh lai, a karh lai lo ti cu kanmah mipi kan cungah aa hngatmi asi ko.
Kan I ralrin thiam ve phot ko ahcun a karh tuk lailo, nain kan I ralrin lo le zeirello in kan um ahcun a karh chin thluahmah ko lai. Cucu a fiangmi asi ko. Nain hi zawtnak ruangah lungrethei tukin mitkuh cimlo le lungpi thingpi khinhmi bang khing rit tukin um ding cu asi hnga lo. Kannih cu Pathian a zummi kan si. Baibal bia a zummi kan si. Baibal nih zei thil hmanh a hmunmi an um lo zia fiang tein a kan chimh ko ttung.
Zeicahdah lungretheih tukin kan um. Ni nikhat ahcun hi zawtnak hi a dongh caan a phan ve te ko lai, a ruang cu zei thil hmanh hi a hmunmi an um lo I zeipaoh nih hin caan an ngeih cio caah asi.Crd; Sui Len Tial.
Leave a Reply