Covid 19 zawtnak ruangah thla tampi chung i vua loin an um hnu ah Aung La Nsang cu One Championship kulh chung ah kan hmuh than cang lai. Amah a rak ngiar lengmang tu MMA fighter De Ridder he October 30 ah an i phomh lai tiah One Championship ngeitu Chatri Sityodtong nih Official in mipi theihter nak a tuah cang.
De Ridder cu One Championship Middleweight Champion taisawmh caah Aung La tthua khotu ding kawlnak ah Leandro Ataides a rak teitu a si i, teinak a co bak in Aung La ngiar colhtu zong a si. Tu kum kumthok ah Aung La Nsang he i tthua dingin tawlrel a si nain, De Ridder nih kai khawnden ruangah kai tthua kho lai lo a ti caah One Championship Middleweight Champion taisawmh caah Bigdash le Aung La Nsang cu i tthua ding in One Championship lei nih thawng an thanh.
Asinan, Covid 19 zawtnak ruangah an i tthuatnak ding ni cu voi 3 tiang an thawn. Covid 19 zawtnak ruangah can saupi tthuat kho loin an um chungah De Ridder zong a dam manh cang i One Championship Middleweight Champion taisawmh caah Aung La vs Bigdash ti si tthan loin Aung La vs De Ridder cu October 30 ah an tthua lai tiah One Champion lei nih thawngthanhnak a tuah hi asi.
One Championship nih Official bak in an phuanmi a si i buainak dang a um lo ahcun an iphomh taktak cang lai. An i phomhnak ding hmun le hma tu cu One Championship lei nih thawngthanhnak an tuah than te lai.
De Ridder cu MMA dirhmun ah voi 12 aa phomh ve cang i, voikhat hmanh a sung bal lomi pathawng a si. Aung La Nsang he an iphomhnak ah zei an lawh lai ti cu hohmanh chimh khawh si rih lo. Aung La Nsang cu MMA ah mi 37 he ai tthua cang mi a si i, voi 10 a sung i voi 26a tei. Tutan ah One Championship ah Lightheavyweight Champion taisawmh le Middleweight Champion taisawmh a cotu a si.
Credit: Onlinenungak
Leave a Reply