Zualko; Kalaymyo Ah AG Church Pastor Rev.France Cu Covid In A Nunnak Liam

Kalaymyo Ah AG Church Pastor Rev.France Cu Covid In A Nunnak Liam, Kalaymyo Tawngphila AG Church Pastor Rev.France cu Covid in June 13,2021 zaanlei suimilam 1:30PM ah a nunnak a liam tiah kan theih. Rev.France hi kum 53 asi i fanu fapa pali a ngei,nu pahnih le pa pahnih an si tiah Church riantuan hawi sinin kan theih. Nizaan June 12 zongah Ramthlo AG Church Pastor Rev.Piang Bik Covid in a nunnak a liam.Crd-the chin post.

Thawng pang dang relchap; A poi tuk ee,, SAC ralhrang ruang ah Khuahring tlang chung in khua thum nih khua an chuah tak, ralzaam dirhmun ah an dir cang, State Administration Council (SAC) ralhrang le Chinland Defense Force-Thantlang (CDF) kar 2021 June 10 i kahdohnak a chuah hnu Thantlang peng Khuahring tlang khua chung in khua thum cu an khua an chuah tak dih cang tiah theih a si.

Khua a chuah tak mi hna hi, Mualkai, Tihbual le Tlangkhua hna an si tiah thawng kan theih. Hi kong he pehtlai in min langhter duh lo pakhat nih, “June 10 ahkhan SAC ralhrang le CDF-Thantlang hna karlak ah kahdohnak a chuak. Hi kahdohnak a chuak hnu in an i kahnak pawngkam i khuami hna cu kan um ngam ti lo ca ah khua kan chuah tak,” tiah a chim.

Mualkai le Tihbual khua hna hi June 10 in khua an chuah tak. Hi hna khua hnih chung ah SAC ralhrang nih Tihbual khua chung ah umhmun an khuar. Cun, Mualkai khua i an zuat Ar zong an thah dih i ei loin inn leeng ah an chiah hna tiah theih a si.

Cun, “June 10 i an kahnak hmun hi Tihbual le Mualkai karlak ah a si. An i kah hnu in nihin tiang SAC lei nih nifatin bomb le meithal an thlah peng. Nikhat ah bomh an thlah mi hi zuun 100 fai cu a si peng lai,” tiah a chim.

2021 June 10 i SAC le CDF-Thantlang kar i kahnak ah SAC lei in minung 17 an nunnak a liam. CDF nih an meithal zuun nga le hriamnam dangdang zong an laak khawh. CDF lei tu cu hliam a tuarmi le a thimi an um lo tiah kan theih.Photo/Tlangkhua khuami hna an i timhlamh lio a si.Crd- the hakha post.