Zualko- Kut Hriṭem Buin Thah Mi Ruak Hnih Hmuh A Si

Mandalay Ramṭhen, Ngazun Peng Ah Kut Hriṭem Buin Thah Mi Ruak Hnih Hmuh A Si, Mandalay ramṭhen, Tada U pengkomh, Ngazun peng Pauksein khua, Myotha-Myinchain kalnak lampi ah, nihin zinglei ah kut ṭem buin thahmi ruak pahnih kan hmuh, tiah tualchung mi bawmchantu phu nih an chim. “Nihin September 26, zinglei suimilam 8:30 ah ruak hi kan hmuh. Thah a tongmi hna hi Myinchain peng, Nabuai khuami changreu tuahtu pafa an si i an pahnih in an kut hnulei ah hriṭem buin an ruak hmuh a si,” tiah khuachung bawmhchanhnak rianṭuantu pakhat nih a chim.

Cu thilcang kong he pehtlai in Tada U pengkomh humhimnak latu phu hna he naihniam in ummi pakhat nih cun, “thah a tongmi hna hi Myinchain peng Nabuai khuami U Maung Hla(kum 57) le a fapa U Thein Wai Oo(kum 38) an si i, anmah hi changreu tuahmi mi sawhsawh an si. Aho si theih lomi 10 hrawng nih an kut hnulei hriṭem in an kah hna, hi thil a tuahtu hi hlathlainak tuahcuahmah lio a si” tiah a chim. Thawng dang relchap- SAC Ralbawi Ngan Pathum Cu SAC Chungtel Sinak In An Chuah Cang Hna.

SAC nih Lieutenant General Moe Myint Htun le Lieutenant General Soe Htut cu SAC chungtel sinnak in kan chuah hna i Soe Htut cu SAC zung Minister rank zong in kan chuah cang, tiah zahan September 25 zan ah SAC nih cathanh an chuah. Sepbember 25 zan suimilam 8:00 ah SAC nih an thanh ning in, SAC Council chungtel ralbawi ngan pahnih cu kan chuah cang hna. Cu pinah Minister For Home Affairs Lieutenant General Soe Htut zong a rank in kan chuah i ral lei kong a rak tlaih mi rank ah kan ṭhumh ṭhan, tiah an langhter.

Cu pinah dollar man a kaitertu le eihmuar ruangah dantat a tongmi SAC Deputy Minister of Economy and Commerce Ngunt Aung zong a rank in an chuah. SAC Election Commission chungtel pa zong Council in an chuah i Minister of Economy and Commerce Aung Naing Oo cu SAC Minister zung pakhat ah rian an khinh i, Htun Ung cu Minister of Economy and Commerce ah an thim,crd- The Chin Post. Thawng dang- SAC Ralkap Raltuknak Vanlawng Chiahnak Hmun Cu Kachin Ralkap Nih An Kah.

Kachin ramkulh, Myitgyina vanlawng sakhan cu Kachin hrambunh tualchung hriamtlai phu nih an kah i vanlawng pahnih zong an khen kong Kachin ramkulh hrambunh tualchung hriamtlai pahkahphah in Bu Tauk nih Khit Thit Media ah a chim. Nizaan, September 24 zinglei suimilam 7:40 ah Kachin ramkulh, Myitgyina vanlawng chiahnak sakhan cu 90mm lung hnih le 107mm lung hnih in an kah i sakhan chung ah puahkehnak a chuak. “Raltuknak vanlawng pahnih zong an khen, tiah vanlei thawngthanhnak sin in kan theih,” tiah Bu Tauk nih a chim.

Thawngpang kan theih ning ah cun F-7 raltuknak vanlawng pahnih cu bomb nih a khen pinah vanlawng lei i pehtlaihnak tower tung zong a khen tiah kan theih” tiin a chim. Myitgyina vanlawng tual pawngkam ah a um mi hna nih cun, nizaan zinglei suimilam 8:00 hrawng ah Myitgyina vanlawng chiahnak sakhan ah puahkeh thawng pehtlai in kan theih, tiah an chim ve.