Zualko- Li-hninh Ruang Ah Minung 160 Leeng An Thi, A Chuak Kho Rih Lo Mi Zong An Um

Indonesia Li-hninh Ruang Ah Minung 160 Leeng An Thi, A Chuak Kho Rih Lo Mi Zong An Um, Indonesia ram, Java Island ah li aa hnin i Minung 160 leeng an thi cang, cun hmapu mi le a chuak kho rih lo mi zong an um tiah theih a si. A chuak kho lo mi milu bel theih khawh a si rih lo. Nitlak Java lei ah Sikpar 21 chun hnu in 5.6 tluk a si mi li aa hninh ruang ah a rawkral mi, aa khawngmi le a thimi an tam hi a si tiah theih a si.

Siizung ah mi tam tuk an rak phan, an i tlum lo ca ah siizung leeng zong ah thlop cuahmah an si. Mi bawmchantu hna zong din lo in zaankhua dei rian an ṭuan i a chuak kho lo mi pawl zong an chuah cuahmah hna. Minung 162 an thi cang tiah thawng theih a si. A ruh kiakmi an tam bik i minung 326 hrawng an i khong tiah media pakhat nih cun a langh ter.

Li aa hninhnak hmun hi minung an chahnak hmun a si, cun vawlei zong an cim hna. Li hninh ruang ah minung 13000 leeng an umnak hmun in an zaam tiah theih a si. Thawng dang relchap- Bualte khua pum tlamtling lo pakhat SAC ralkap nih an thah, Chin ramkulh, Falam peng, Bualte khua ah a um mi kum 56 pa Hau Cung Nung cu SAC ralkap nih an thah tiah thawng theih a si.

Bualte khua pawng November 19 ah SAC ralkap le CNDF hna karlak ah kahdohnak a chuak i cu kahdohnak a chuah ni ah Pa Hau Cung Nung cu a tlau i November 21 zinglei ah hma he a thih kha an hmuh tiah khuami hna nih an chim. Amah hi pum tlamtling lo a si, a thluak a ṭha pah lo, a hna zong a ṭha tuk lo, kahdohnak a chuah lio ah khuachung ah a um. Khuachung in zaam ka duh lo a ti” tiah Bualte khuami pakhat nih Khonumthung Burmese ah a chim.

SAC ralkap le Chin hriamtlai phu hna cu November 15 thok in Tibual khua le Bualte khua pawng ah kahdohnak fak pi in a chuak i a pawngkam khuami hna zong an zaam dih tiah theih a si. Midang an zaam dih lio ah Pa Hau cu zaam lo in khuachung ah a tan caah SAC ralkap nih an thah hi a si tiah theih a si. Cu kahdohnak ah SAC ralkap nih vanlei kahdohnak fak pi in a tuah nain mipi hriamtlai pawl an him i SAC ralkap 30 leng an thi tiah CNDF nih a thanh.crd- The Chinland Post.