John 3:6 ah cun”Taksa (flesh)nih a hrinmi cu taksa a si.Thlarau nih a hrinmi cu thlarau a si.”tiah Bawi zisuh nih a chimmi kan hmuh.Zei thil kan tuahmi paoh hi,Bawi Khrih kan dawtnak thinlung in kan tuahmi an si lo paoh ah cun minung nih thiltha tuah kan timi le thilthalo tuah kan timi hna cu a zeihmanh an i dannak a um hlei lo.Thiltha tuah kan timi zong kha a ttha mi an si hlei lo i sual tuah kan timi zong kha a sual hlei lo.An i khat ko.A ruang cu,minung cu misual kan si ca ah a si ko.Zeitluk in thiltha kan tuah kan ti len ko hmanh ah Pathian hmai ah cun,”Taksa nih a hrinmi cu taksa a si” tiah Bawi Zisuh hrimhrim nih a ti ko ca-ah thiltha tuah an rak si hlei lo. Paul nih cun taksa(flesh) kha “minung hlun” tiin a hman (Romans6:6)).Kan minung hlun cu,KEI MAH kha a si i,cu KEI MAH kha vailam ah thah a si nak hnga hi vawlei ah Bawi Khrih a rat nak hi a si.
Cu ca-ah vawlei nih thiltha tiah a ruahmi din le fel hna hi minung mithmuh ah cun thiltha ngai a lo ko lai na in Bawi Zisuh dawtnak thinlung in kan tuahmi felnak, Amah Bawi Zissuh zumh nak in kan ttuanmi dinnak, “Pathian Thlarau nih a hrinmi”zumhnak in kan tuahmi a si lo paoh ah cun, Thiltha tuah ah kan relmi hna le kan ruahmi hna cu,Pathian hmai ah cun, “Kan dih lak in misual kan si,kan thil tuahmi ttha bik kan timi hna hmanh hi puanchia fihnung an si.(Isaih64:6) a ti bang, pakpalawng an si ko lai. Cu ca-ah minung nih thiltha tiah kan ruah i kan tuah mi paoh khi Pathian nih a duh ko, Pathian a lawm ko timi Zisuh Khrih (Pathian dawtnak )tello in Pathian lungtawn kan i timh lengmang mi attet tuk cangmi kan Theology pi hi cu “trash-can”ah kan hlawnh a hau ko cang.
Zeitintiah, Nangmah sualnak ruang ah nangmah te in na in hnga dingmi na sualman vial te kha Zisuh Khrih nih nangmah ai awh in vailam cungah an thih piak cang.Nangmah sualnak ruangah a chuakmi Pathian thinhun nak vialte kha Pathian nih a Fapa Zisuh Khrih cungah abungh dih cang.Bible nih cun, ”Pathian nih kan sualnak vial te kha Amah (Bawi Zisuh Khrih) cungah a khinh dih.”(Isaiah53-6) ti in an kan chimh.Nangmah aiawh in a thi mi Zisuh Khrih kha Pathian nih a zoh i, “misualpa (kei mah timi kan minung hlun)” cu a thi cang ti kha a hmuh tikah Pathian a lung atling cang.
Pathian aa lawm cang.Pathian aa lawmnak le a lung a tlinnak cu Bawi Zisuh Khrih ah khin a si, Bawi Zisuh Khrih nih a tuahmi ah khin a si. Minung kan tuahmi ah khin a si lo.Cu cu a si.Cu ca-ah,Pathian lungtlin khawh nak ding ca-ah le,Pathian lung kan ton khawh nak ding ca-ah ti in misual a simi nangmah le keimah nih a samfang ngaw te hmanh kan tuah khawh mi zeihmanh a um lo. Cun,kanmah minung nih chap khawhmi zeihmanh a um fawn lo.
Pathian nih na sual nak cu,Zisuh Khrih in an ngeihthiam diam cang.Tuah piak cangmi a si.A dih cangmi a si.Nangmah le keimah nih kan tuah khawh bikmi cu thil pakhat te long a um.Cu cu,Pathian nih a Fapa Bawi Zisuh Khrih in vailam cung i a lim cangmi a kan tuah piak cangmi sual ngaihthiam (adawt ) nak kha kan zumh i Bawi Zisuh Khrih kha Bawi le Khamhtu ah kan thinlung chung in vun co hlan te kha a si ko.Cu cu, Bawi Zisuh nih a kan cawnpiak mi,Pathian nih a duhbik mi”Pathian duhnak tuah”timi cu a si ko.Kan fian khawh deuhnak hnga ca-ah John 6:28-29 chung bia kha vun rel ta hmanh.Bible nih “Jesuh nih cun. Pathian nih a thlahmi (Bawi Zisuh Khrih) zumh kha Pathian duhnak tuah cu a si ko.(This is the work of God that you believe in Him (Jesus Christ) whom He (God the Father) sent,”tiah a kan chimh.
Cun,1corin13:3 ah cun”Ka ngeih vialte pe in ka pum zong hi khangh awk ah pe hmanh ning law dawtnak ka ngeih lo ah cun zei san hmanh a tlai lo.”tiah Paul nih a chim mi kan hmuh.Mi caah amah Paul nih angeih mi achaw ava angeih achiah vial te pek tiang long hmanh si lo in amah apum(a nunnak) hmanh kha mi caah martar thih nak tiang va intuar ko hmanh zongah dawtnak ka ngeih lo ah cun a ti duh nak a si.Hi ka ah hin, Paul nih a chim duhmi “dawtnak” hi zeibantuk dawtnak ko hme a chim hnga?Nunpek tiang in mi ca-ah dawtnak thinlung he va ttuan le va tuah piak ko ttung i “dawtnak ka ngeih lo ah cun” a ti chap rih mi, “cu bantuk dawtnak” cu, zeibantuk dawtnak ko hme a si hnga? “Pathian nih cun zeitluk in dah an kan dawt kha hi ti hin a langhter.
Kan nih cu misual kan si ko rih lio ah hin Khrih cu kan ca-ah a thi (Romans5:8)”a timi “Minung fim nak (thluak) nih a hngal khawh lomi (Efesa 3:19)” “Pathian dawtnak kha Thiangthlarau nih kan thinlungah a toih in an kan toih(Romans 5:5)” tikah, cu dawtnak nih an kan tuahter mi le a kan chimter mi Pathian nih a Fapa Bawi Khrih in a kan dawtnak kha a chimmi a si.Cu ca-ah amah mithiang Paul nih,”Lamkaltu midang hna nak khan fak deuh khin rian ka tuan(kai zuam).Cu ti kai zuam cu keimah minung sinak.
keimah timi ka minung hlun) in kai zuam kha si lo in ka chung i a ummi Pathian dawtnak (Zisuh Khrih) nih a ka zuam ter.(1corin15:10)tiah a timi kha a si. Cu ca-ah nu le va,pa le fa,pi le pu,uu le nau hawi le kawm kan i dawtmi te hna hi cu, zumlo tu hmanh nih an ngeihmi dawtnak phun a si ko i,Bible nih cun hi ban tuk dawt nak phun hi cu taksa nih a hrin mi cu taksa a si a timi “taksa dawt nak”tu kha a si deuh. Cun,amah Paul thiamthiam nih”Mizeihmanh nih a tuanmi rianphun(every man’s work of what sort it is) theng te kha hneksak a si lai(1corin3:13 )a ti.Zei in dah?Mei in hnek sak a si lai a ti.
An ttuan mi rian tu cu a tlawm a tam a tilo i zeibantuk lungput ngeih in dah Bawi Khrih ca-ah kan ttuan timi tu kha a biapi deuh. “Nannih cu Messiah zultu nan si ruangah mi nih (ka min in)ti hrai khat te hmanh an i pek hna ah cun, cu hna cu laksawng(reward) hmu lo in an um hrimhrim lai lo. (Mark9:41)” tiah kan Bawipa Zisuh Khrih nih Bia a kan kamhmi a um.Amah Bawi Khrih dawtnak thinlung in kan tuahmi,kan tuanmi cu tikik hrai khatte a va si ko zongah Bawipa mitt le thinlungah cun a sunglawi tuk.Man a ngei tuk. Keimah min in(in my name) a ti ko ca-ah.
Amah Min lawng in kan tuahmi le kan ttuanmi hna lawng kha laksawng a um i, Amah zumh lo le Amah dawtnak thinlung ngeihlo bu in (A phung men in Bible sianginn kan kai i,pastor hna kan hei ttuan ko ah cun ) kan ttuan mi, kan tuahmi kan chimmi hna cu,minung mithmuh ah cun, zeitluk in a va tthat ko zongah laksawng a um lo ti nak a si cu.Pakpalawng tinak a si cu.Cu ca-ah Bawi Khrih nih a kan dawt bantuk in kanmah zong nih Bawi Khrih kan dawt nak thinlung he kan tuah, kan ttuan ve a hau.
Bawi Khrih dawt nak thinlung in kan ttuan mi le kan tuah mi an si lo paoh ah cun,”taksa nih a hrinmi cu taksa a si” a ti ko ca-ah,kan ttuan mi phun paoh kha mei in hneksak an si tik ah cun, capawl bantuk in an ziam dih te ko lai.
Leave a Reply